Түркістан облысы Келес ауданындағы мектепте орын алған оқиға жұршылықтың жағасын ұстатты. Сегізінші сынып оқушысы сыныптастарымен жанжалдасып қалғаннан кейін, мектептің үшінші қабатынан секіріп кеткен.
№ 1 мектеп директорының тәрбие жұмысы жөніндегі орынбасары Бердібек Бұхарбаевтың айтуынша, сыныптастарымен кикілжіңге түскеннен кейін эмоцияға беріліп, осындай жағдай орын алған. «Бұл жағдай бәрімізге оңай соққан жоқ, осы оқиғадан кейін мектептегі психологиялық ахуалды жақсарту үшін профилактикалық жұмыстарды белсенді жұмыстар жүргізіп жатырмыз», — деді ол.
Қыз ауыр жарақат алғанымен, аман қалды, ол бірнеше күн реанимация бөлімінде жатты. Травматолог-дәрігер Абдусамат Утамұратов қыздың денсаулық жағдайының егжей-тегжейін айтты: «Қажетті диагностикалық процедуралар жүргізілгеннен кейін оның бас миының жарақаты, сондай-ақ жамбас сүйегі сынғаны анықталды. Протоколға сәйкес емдеу жүргізілді, бақытымызға орай, қазіргі уақытта науқастың жағдайы тұрақты»
Аталған оқиға кең ауқымды қоғамдық резонанс тудырып, жағдайдың барлық мән-жайын анықтау мақсатында қылмыстық іс қозғалды. Жергілікті билік органдары мен мектеп әкімшілік басқармасы оқушының осындай қадамға баруына не себеп болғанын анықтап жатыр.
Бұл жағдай оқушылардың психологиялық жағдайына назар аударудың маңызды екенін және білім беру мекемелерінде осындай оқыс оқиғалардың алдын алу бойынша қауіпсіз және қолдау білдіретін білім беру ортасын құруға бағытталған тиімді бағдарламаларды әзірлеу қажеттілігін көрсетті.