Самара-Шымкент тасжолында 3000 көлік кептелісте тұрып қалғаннан кейін Ақтөбе облысында қозғалысты белсенді қалпына келтіруге кірісті. «ҚазАвтоЖол» хабарлағандай, 208 ауыр жүк таситын көліктен тұратын колонна Қарабұтақ-Хромтау тас жолына бағыт алды.
Бір сағат ішінде 249 көлік бірлігі Хромтау — Қарабұтақ — Хромтау учаскесін жүріп өтті. Қазіргі уақытта автожолдарды қысқы күтіп-ұстау жұмыстары қарқынды жүргізіліп жатыр. Ақтөбе облысында 53 жол техникасы мен 96 маман жұмылдырылды.
Айта кету керек, 11 ақпанда қолайсыз ауа райына байланысты Ақтөбе мен Қарабұтақ ауылы арасындағы учаскеде 2768 жүк көлігі мен 550 жеңіл көлік жиналып қалған. Алайда жедел шаралардың және жолдарға қызмет көрсету жөніндегі команданың күш-жігерінің арқасында жағдай шешіліп, қозғалыс қалпына келтірілді.