Қазақстан Президенті Қасым-Жомарт Тоқаев Римге ресми сапары барысында БҰҰ Дүниежүзілік азық-түлік бағдарламасының атқарушы директоры Синди Маккейнмен кездесті. Кездесу барысында Қазақстан мен БҰҰ ҰҚЖ арасындағы гуманитарлық көмек пен серіктестіктің өзекті мәселелері талқыланды.
Қасым-Жомарт Тоқаев мұндай кездесулер жаһандық азық-түлік қауіпсіздігін қамтамасыз ету және гуманитарлық жобаларды іске асыру жөніндегі шараларды талқылау үшін маңызды екенін атап өтті. Президент Қазақстан бірнеше елге, соның ішінде Палестина мен басқа да дүлей зілзалалардан зардап шеккендерге гуманитарлық көмек көрсеткені туралы ақпаратпен бөлісті.
Президент Ауғанстандағы жағдайға баса назар аударды. Мемлекет басшысының пікірінше, халықаралық қоғамдастықтың осы елдегі гуманитарлық дағдарысты тоқтату ісін жалғастыруы өте маңызды. Қасым-Жомарт Тоқаев қазір Алматыда Орталық Азия мен Ауғанстан үшін БҰҰ-ның Орнықты даму жөніндегі аймақтық орталығын ашу жұмыстары жүргізіліп жатқанын жеткізді. Бұл Орталықтың қызметі аймақтағы бейбітшілікті, қауіпсіздікті және орнықты дамуды нығайтуда БҰҰ-ның ведомствоаралық үйлестіру жұмысын реттеуге мүмкіндік береді.
Кездесу соңында Қасым-Жомарт Тоқаев Синди Маккейнді алдағы Астана халықаралық форумына қатысуға шақырды.