Қазақстанның Ішкі істер министрлігінің жедел қызметтері жыл басынан бері 300-ден астам қауіпті қылмыскерді ұстады. Сонымен қатар, бұрын хабар-ошарсыз жоғалып кеткен деп танылған 200-ден астам адам тәртіп сақшыларының табысты жұмысының арқасында табылды.
ҚР ІІМ криминалдық полиция департаменті басқарма бастығының орынбасары Жангелді Табилов қауіпті қылмыскерлердің ұсталуы туралы егжей-тегжейлі айтып берді. Мәселен, Павлодар облысының кенттерінің бірінде жедел-іздестіру іс-шараларын жүргізу кезінде павлодарлық тұрғынды атыс қаруымен атып өлтіргені үшін 2011 жылдан бері халықаралық іздеуде жүрген Данат Бакибаев ұсталды
Алматы облысында Сабыржан Масахбаев ұсталды. Ол 2023 жылдың аяғында Алматыда топ құрамында бола отырып, алдын ала сөз байласу арқылы Сингапур азаматына шабуыл жасап, 3 млн теңге мен 13 мың АҚШ долларынан астам сомада ақшаны тартып алған. Ұсталған адамның сыбайластары бұрын құрықталған.
Түркістан облысында полиция 10 жыл бойы халықаралық іздеуде жүрген Өзбекстан азаматы Жамшид Ахмедовты ұстады. Шетелдік Сарыағаш ауданындағы “Жібек жолы” шекара бекетінде шекарадан өту кезінде қамауға алынды. Ер адам 2014 жылдан бастап Ресей Федерациясының Иркутск қаласында кісі өлтіргені үшін іздеуде болды.
ІІМ жедел бөліністерінің қызметкерлері Шымкентте көрші мемлекеттің құқық қорғаушыларымен алаяқтық жасағаны үшін іздеуде жүрген тағы бір өзбекстандық Маруфжон Жураевты ұстады.
Айта кету керек, Ішкі істер органдарымен жүргізілетін іздестіру жұмыстары жасалған қылмыс үшін жазаның бұлтартпастығын қамтамасыз етуді көздейді. Құқық қорғау органдарының тиімді қызметінің арқасында қауіпті қылмыскерлер темір тордың ар жағына қамалып жатыр.