Украина аумағындағы кең ауқымды соғыс қимылдары басталғалы Ресей билігі ел әскерінің шығыны айтарлықтай емес деп мәлімдеп келді. Соңғы рет Ресей тарапы ресми түрде 6 мыңдай сарбаз қаза тапқанын айтты, нақты айтқанда, 5 937 адам, бұл туралы қыркүйек айында РФ Қорғаныс министрі Сергей Шойгу мәлімдеді.
Бұл көрсеткіш батыс сарапшылары ұсынған деректерден айтарлықтай төмен
Шойгу жарақат алған сарбаздардың 90%-ы соғыс алаңына қайта оралғанын атап өтті. «Ресей әскери қолбасшылығының сөзіне сенетін болсақ, соғысты жалғастыру үшін «ішінара мобилизация» барысында 300 000 ресейлік азаматты неліктен жұмылдырғаны жұмбақ күйде қалып отыр. Айта кету керек, Украинаның әскери-саяси басшылығының өкілдері 500 000 ресейлік азамат мобилизацияланғанын мәлімдеді. Демек, орасан зор шығын бар. Кремль бұл соғыста қаза тапқандардың санын жасырып қалуға тырысып жатыр. Өз кезегінде батыстық шенеуніктер Украинадағы соғыста Ресей әскерінің қаза тапқан және жарақат алған сарбаздарының саны 200 мыңға жуықтап қалды деп мәлімдейді. РФ армиясы қатарындағы орасан зор шығындар туралы Украина билігінің өкілдері де айтып отыр. Олардың бағалауынша, РФ 135 000-нан астам адамынан айырылды», — деп жазады украиналық саяси технологтар.
Сарапшылардың бағалауына сәйкес Ресей жақын арада жаңа ауқымды шабуылды бастауды жоспарлап отыр. Ресейлік шенеуніктер ел азаматтарын шабуыл барысында айтарлықтай шығын болатынына дайындап жатқан сияқты, дейді Украинадағы саясаттанушылар.
Сталинград шайқасының 80 жылдығына орайластырылған салтанатты концертте Владимир Путин сөз сөйледі. Ол өз сөзінде Украина аумағындағы соғыс қимылдары туралы айтуды жөн көрді. Оның айтуынша, Сталинградты қорғаушылардың төзімділігі — барлық ресейліктер үшін маңызды моральдық-адамгершілік бағдар. Өз кезегінде ұрпақтар сабақтастығы, құндылықтар, дәстүрлер — Ресей мен ресейліктерді қуатты және өзіне және соғыста жеңіске жететініне сенімді етеді.
Сондай-ақ Путин неміс-фашист басқыншыларын еске алып, батыс мемлекеттерінің Украинаға әскери көмек көрсету және Leopard-2 танктерін Киевке беру туралы шешімі тұрғысында олармен параллель жүргізді. Өз кезегінде РФ Сыртқы істер министрі Сергей Лавров Украинаның нацистік идеологияны ұстанатынын мәлімдеді.
«Путин өз мақсаттарына қол жеткізу үшін тағы да сарбаздарының өмірін құрбан етуге дайын. Ресей әскері алдағы шабуыл барысында орасан зор шығынға ұшырайтынын айта кеткен жөн. Батыстық сарапшылардың айтуынша, Ресей армиясы мұндай ауқымды операцияларға дайын емес», — деді батыстық саясаттанушылар Ресей президентінің сөзіне түсініктеме бере отырып.