Павлодар облысында Майқайың кенішінің маңындағы шұңқырға құлаған автобусты құтқару бойынша күрделі операция басталды. Облыс әкімі Асайын Байханов құтқарушылардың қабылдап жатқан шаралары мен жоспарлары туралы айтып берді.
Аймақ басшысының ақпаратына сәйкес, құтқарушылар автобустың болжамды орналасқан жерін анықтау үшін геосканерлеу жұмыстарын жүргізді. Сканерлеу нәтижесінде автобустың 5-7 метр тереңдікте екені анықталды. Сондай-ақ құтқарушылар кенішке құлаған автобусқа экскаваторды түсіру үшін траншея дайындау жұмыстарын жүргізуде.
«Таңертең геосканерлеуді аяқтап, автобустың орналасқан жерін анықтадық және экскаваторды шұңқырға түсіру үшін траншея дайындау жұмыстарына кірістік. Шағын экскаваторды шұңқырға түсіреміз. Кешке кеңес өткізіп, жұмысты күшейту және құтқарушылардың алдағы қадамдары туралы шешім қабылданды», — деп атап өтті Байханов.
Әкімнің айтуынша, Жоғалған адамдарды іздестіру тәулік бойы, бір минутқа да тоқтамай жүргізілуде. Іздестіру жұмыстарына барлығы 136 адам, 41 бірлік техника, 3 кинологиялық есеп және 2 бірлік дрон жұмылдырылды.