Сыбайлас жемқорлыққа қарсы қызмет ҚР Ұлттық музейінің басшлылығы қаражат жымқыру ісі бойынша тергеу жүргізуде.
Нұр-Cұлтан қаласы бойынша Cыбайлас жемқорлыққа қарсы қызмет ҚР Мәдениет және спорт министрлігінің «Қазақстан Республикасының Ұлттық музейі» РМҚК лауазымды тұлғаларына қатысты «Алтын адамның әлем музейлеріне шеруі» халықаралық көрмесін өткізу бойынша Мемлекеттік сатып алу туралы шарт аясында 146 млн теңге сомасында бюджет қаражатын жымқыру белгілері бойынша сотқа дейінгі тергеу жүргізуде. Шарттың жалпы сомасы 1,2 млрд теңгені құрайды.
«Тергеу сотының санкциясымен қазіргі уақытта тінту, сондай-ақ куәлардан жауап алу және басқа да тергеу әрекеттері жүргізілуде. Іс бойынша түпкілікті шешім қылмыстық іс жүргізу заңнамасының талаптарын орындау нәтижелері бойынша қабылданатын болады», — деп хабарлады Сыбайлас жемқорлыққа қарсы қызмет.
Өзге ақпарат тергеу мүддесінде жария етілмейді.
Бұған дейін әлеуметтік желілерде Ұлттық сузейдің басшысы Арыстанбек Мұхамедиұлы жемқорлық жасады деген күдікке іліккені туралы ақпарат тараған болатын. Ұлттық музей бұл ақпарат жоққа шығарды. Мұхамедиұлы қазір ауруханада жатыр. Ол музейге қатысты туындаған жанжалға қатысты түсініктеме берген болатын. Арыстанбек Мұхамедиұлы музейге қатысты тексеруді негізсіз деп атады.
Қазақстандық актер Тұңғышбай Жаманқұлов Ұлттық музейдің директоры, бұрынғы Мәдениет және спорт министрі Арыстанбек Мұхамедиұлының үстінен арыз жазғанын растады, деп хабарлайды «Неге».
«Біздің арамыздағы қандай келіспеушілік екенін білесіздер ғой. Оны бүкіл Қазақстан біледі. Студент қыздарды қорғағаным үшін менің абыройымды төгіп, маған өтірік жала жапты. Өтірік айтып, мені жерге қаратты. Қой дегенде қоймады ғой! Иә, мен арыз жаздым. Оны жасырмаймын. Бұл өзі қасына адам жинайды да, оларды кейін сатып кетеді ғой. Сол сатып кеткен адамдары маған құжаттарды дайындап, әкеліп берді. Нақты дәлелдер бар. Ол құжаттардың бәрі менде тұр, соның бәрін келтіріп, үстінен арыз жаздым», — деді Тұңғышбай Жаманқұлов.
Оның айтуынша, Арыстанбек Мұхамедиұлы бұрын «ана кісінің» қамқорлығында болған.
«Ол ешкім тиісе алмайтын адам еді. Сол кезде айттың не, айтпадың не, бәрі бекер еді. Талай рет айттық. Сот арқылы да біздің жазығымыз жоқ екенін дәлелдегенбіз. Бірақ ол ана кісінің қамқорлығында болғаннан кейін бәрі қорықты. Әділетсіз үкім шығарды, әділетсіз тергеу жасады. Енді қазір дүние өзгерді», — деді актер.