Атырау облысында қайта жаңғыртылған «Астрахан-Маңғышлақ» магистралды су құбыры Атырау және Маңғыстау облыстарына қосымша 60 мың текше метр су береді. ҚР Премьер-Министрі Әлихан Смайылов бейнебайланыс арқылы нысан жұмысын ресми түрде іске қосты.
«Қайта жаңғыртылған «Астрахан-Маңғышлақ» магистралды су құбыры Атырау және Маңғыстау облыстарының халқы мен кәсіпорындары және ауыл шаруашылығы үшін қосымша 60 мың текше метр су беру көзіне айналады», — деп атап өтті Әлихан Смайылов.
Жоба шеңберінде тозығы жеткен жабдықтарды жаңарту жұмыстары жүргізіліп, ұзындығы шамамен 177 шақырым магистралды су құбырының екі учаскесі ауыстырылды. Құрылысқа 500-ден астам адам жұмылдырылған. Соның нәтижесінде «Астрахан-Маңғышлақ» су құбырының өткізу қабілеті тәулігіне 110-нан 170 мың текше метрге дейін артты.
Смайыловтың мәлімдемесіне сәйкес, үкіметтің мақсаты 2026 жылға қарай елді мекендерді 100% ауыз сумен қамтамасыз етіп, халық пен өндіріс орындарын одан әрі тұрақты су көздерімен қамтамасыз ету. Ол үшін жаңа гидротехникалық құрылыстар мен су құбырларын салу және қазіргі құбырларды жаңғырту бойынша жобалар іске асырылып отыр. Елді мекендерге су тарату желілері салынуда, ал шалғай ауылдарда жер асты көздерінен сорғы модульдері орнатылып жатыр. Алдымызда әлі де көп жұмыс бар.
«ҚазМұнайГаз» ҰК» АҚ басқарма төрағасы Мағзұм Мырзағалиев мәлім еткендей, жобаны іске асыру кезінде телекоммуникациялық және бақылау жабдықтары, катодты қорғау стансалары мен автономды гибридті қондырғылар, сондай-ақ құбыр өнімдерінің бір бөлігі отандық өндірушілерден сатып алынды.
«Астрахан-Маңғышлақ» магистралды су құбыры 1988 жылы пайдалануға берілген. Аталған су құбыры – Атырау облысының Құрманғазы, Исатай және Жылыой аудандары, сондай-ақ Маңғыстау облысының Жаңаөзен қаласы, Бейнеу, Маңғыстау, Қарақия және Түпқараған аудандарының тұтынушыларын сумен қамтамасыз ететін жалғыз орталықтандырылған су көзі. Жалпы, аталған құбырдан суды Маңғыстау облысы тұрғындарының 35%-дан астамы және Атырау облысы тұрғындарының 28%-дан астамы тұтынады.