Сенат депутаттары «2007 жылғы 27 маусымдағы Шанхай ынтымақтастық ұйымына мүше мемлекеттер арасындағы бірлескен әскери оқу-жаттығулар өткізу туралы келісімге толықтырулар енгізу туралы хаттаманы ратификациялау туралы» Қазақстан Республикасының Заңын қабылдады.
Заңға сәйкес ШЫҰ-ның толық құқылы екі мүшесіне 2017 жылдан бастап Үндістан мен Пәкістан Ислам Республикасына бірлескен әскери жаттығуларға қатысу мүмкіндігі беріледі.
Сенат спикері Мәулен Әшімбаев бүкіл әлем бойынша геосаяси ахуал күрделене түскенін еске салды. Жаңа сын-қатерлер пайда болып жатыр. Сондықтан тұрақтылық пен қауіпсіздікті сақтау, Тәуелсіздікті нығайту маңызды мәселе болып табылады. Осы тұрғыдан алғанда Шанхай ынтымақтастық ұйымының маңызы зор, деп атап өтті Сенат Төрағасы.
«Өңірлік қауіпсіздікті қамтамасыз ету үшін біз осы ұйым аясында өзара іс-қимыл жасауымыз керек. Осылайша біз ынтымақтастығымызды нығайта отырып, жаңа қауіп-қатерлерге қарсы тұру әлеуетін күшейтеміз. Біз бүгін қабылданған Заң Шанхай ынтымақтастық ұйымының тиімділігін одан әрі дамытуға ықпал етеді деп үміттенеміз», — деді Мәулен Әшімбаев.
Сондай-ақ, депутаттар 2008 жылғы 26 маусымда Астанада қол қойылған Қазақстан Республикасының Үкіметі мен Люксембург Ұлы Герцогтігінің Үкіметі арасындағы Табыс пен капиталға салынатын салықтарға қатысты қосарланған салық салуды болдырмау және салық салудан жалтаруға жол бермеу туралы конвенцияға толықтыру енгізу туралы хаттаманы ратификациялау туралы Заңды қабылдады
Заң Люксембург аумағында тіркелген мемлекеттік меншікпен байланысты дивидендтерді салық салудан босату мақсатында ел бюджетінің мүдделерін қорғау қажеттілігіне негізделген. Сонымен қатар, Сенаттың жалпы отырысында депутаттар бірқатар сауалдар жолдады.
Ауылдық мектептердің жұмыс істеуін кезең-кезеңмен шешуге байланысты проблемалар депутат Алтынбек Нұхұлының сауалында баяндалған. Сенат депутаты Нұржан Нұрсипатовтың үндеуі әскери-патриоттық тәрбие мәселелеріне қатысты.
Ғұмар Дүйсембаев мал шаруашылығын субсидиялау ережелерін өзгерту қажеттігі туралы сауал дайындады. Депутат Нұрлан Бекназаров көмірсутектер бойынша электрондық аукциондарды ұйымдастыру тәртібіне байланысты проблемаларды қозғады. Ал сенатор Дүйсенғазы Мусин елдегі құс тұмауына қатысты сауал жолдады.