Қазақстандық параспортшылар әлемнің 38 елінен 300 спортшы қатыстсқан паралимпиадалық жүзуден ең көп медаль жеңіп алды.
Италияның Линьяно-Саббьядоро қаласында өткен Әлем кубогына Қазақстан намысын 9 жүзуші қорғады.
Андрей Афанасьев ел қоржынына екі «алтын» және екі «күміс» салды. Сиязбек Далиев пен Наталья Звягинцева үш медаль олжалады (Далиев екі «күміс» және бір «қола», Звягинцева бір «алтын» және екі «қола»), Диас Кенжебек, Кирилл Ильюкевич және Шахан Жолдасбаев екі медаль жеңді (Далиев «күміс» және «қола» медаль, Ильюкевич «алтын» және «күміс», Жолдасбаев екі «қола»). Сергей Кинах пен Алина Дубинина (екеуі де қола медаль алды) Қазақстан құрамасының қоржынына бір-бір медальдан салды.
Спортшылардың жетістіктері Халықаралық паралимпиада комитетінің (IPC) 2022 жылғы әлемдік рейтингіне енгізіледі. 2024 жылы әлемдік рейтингтік көрсеткіштер негізінде Парижде өтетін жазғы Паралимпиада ойындарына қатысушылардың тізімі құрылады, Ал қазір 2022 жылы маусым айында Португалияда өтетін жүзуден паралимпиада Әлем чемпионатына және қазан айында Қытайда өтетін жазғы Азиадаға нормативтер бойынша іріктеу жүргізілуде. Спортшылар аталмыш жарыстарға белсенді дайындалып жатыр.