Полицейлер Нұр-Сұлтандағы Есіл өзеніндегі теплоходта кеш ұйымдастырушылары мен қонақтарын іздестіріп жатыр.
Куәгерлер теплоходтағы кешті видеоға түсірді. Кадрларда жастардың музыкамен демалып, билеп жатқанын көруге болады. Кадрға отыздан астам адам түсті.
Куәгерлердің айтуынша, демалушылар карантиндік шектеулерде көрсетілген бетперде режимі мен әлеуметтік қашықтықты елемейді.
Денсаулық сақтау министрлігі тауарлар мен қызметтердің сапасы мен қауіпсіздігін бақылау комитетінің ресми өкілі Ержан Байтанаев бірнеше күн ішінде карантин бұзушыларды табатынын хабарлады.
«Аталған факті бойынша көліктегі тауарлар мен қызметтердің сапасы мен қауіпсіздігін бақылау департаменті көліктегі полиция департаментінің желілік басқармасымен бірлесіп видеода көрсетілген тұлғаларды анықтау бойынша тексеруді бастады. Теплоход бизнесінің жетекшілерін полиция жауап беруге шақырды», — деп түсіндірді Денсаулық сақтау министрлігінің өкілі.
Ержан Байтанаев карантинді бұзған барлық жеке және заңды тұлғалар Әкімшілік құқық бұзушылық туралы кодекстің 425-бабының бірінші бөлігі бойынша (халықтың санитариялық-эпидемиологиялық саламаттылығы саласындағы Қазақстан заңнамасының талаптарын, сондай-ақ гигиеналық нормативтерді, техникалық регламенттерді бұзу, адам денсаулығына зиян келтірмеу) жауапқа тартылатынын айтты. Тәртіп бұзушыларға ірі айыппұл салынады.
