Мюнхен конференциясындағы кездесу барысында Қытайдың Сыртқы істер министрі Ван И украиналық әріптесі Дмитрий Кулебаны Бейжің Ресейге қару-жарақ жеткізіп жатқан жоқ деп сендірді. Ван И халықтар арасындағы «дәстүрлі достықты» қолдай отырып, Қытай мен Украина арасындағы ұзақ мерзімді стратегиялық қарым-қатынасты атап өтті.
Ван И қақтығысты саяси жолмен шешуді және келіссөздер жүргізу идеясын қолдай отырып, Бейжіңнің Украина мәселесіндегі принципті ұстанымын білдірді. Ол Қытай қақтығыстарға араласпауға тырысатынын, қақтығыс аймақтарына қару-жарақ жібермейтінін және бейбітшілік орнатуға жәрдемдесуге шақыратынын атап өтті.
«Біз соғысты аяқтау мен бейбітшілікті қалпына келтіру үшін сындарлы рөл атқарамыз. Тіпті бейбітшілік орнатуға үміт ұшқыны байқалатын болса, онда Қытай өз күш-жігерін жалғастырады», — деп мәлімдеді Қытай СІМ өкілі.
Қытай бір жыл бұрын өткен Мюнхен конференциясында Украина мен Ресей үшін бейбіт бастама ұсынуды жариялаған болатын, бұл Украина мен Батыстың келіспеушілігін тудырды. Айта кетерлігі, 2023 жылы қаңтар айында Қытайдың жаңадан тағайындалған Қорғаныс министрі Дун Цзюнь Ресей Қорғаныс министрі Шойгумен келіссөздер барысында украиналық қақтығыс аясында Ресейге қолдау білдірген еді.