Екібастұзда галстуксыз форматтағы сессия өтті, оған қоғамдық қызметкерлер, еңбек ардагерлері мен қаланың белсенділері қатысты.
Екібастұзда қаланың даму жоспарын талқылауға бағытталған іс-шара өтті.
Екібастұзда қаланы кешенді дамыту жоспары (КДЖ) талқыланған үлкен кеңес отырысы өтті. Демалысқа тұспа-тұс келген мереке күнінде – бүгін екібастұздықтар қала күнін атап өтті – стратегиялық сессияға еңбек ардагерлері, қаланың белсенді тұрғындары, өнеркәсіп кәсіпорындарының басшылары, кәсіпкерлер, Екібастұздан шығып, табысқа жеткен азаматтар, тәуелсіз сарапшылар және басқалар жиналды. Сессия «галстуксыз» форматта өтті.
Облыс әкімдігінің баспасөз қызметі Telegram-да хабарлағандай, басқосуда алғашқы сөз сөйлеген Павлодар облысының әкімі Әбілқайыр Сқақов көмір өндірісінің төмендеуі мен бүкіл әлемдегі инновациялық технологияларға көшу үрдісі аясында Екібастұз экономикасын да әртараптандырудың маңыздылығын атап өтті. Бүгінгі таңда отын-энергетикалық кешеннің қала экономикасындағы үлесі 65% құрайды. Осы тұрғыда КДЖ міндеттерінің бірі – осы тәуелділікті азайту.