Бішкектің әкімшілік соты Қырғызстанның мәдениет министрлігінің «Клооп» тәуелсіз басылымының сайтын бұғаттау және одан материалдарды алып тастау туралы шешімін заңсыз деп таныды. Бұл туралы басылымның өзі хабарлады.
Kloop сайтының адвокаты Нұрбек Сыдықов әкімшілік соттың шешімін Бішкек қалалық соты растайтын болса, сайт бұғаттаудан шығарылуы мүмкін екенін атап өтті. Ол сондай-ақ бұл шешім сайттың орыс тіліндегі нұсқасына ғана қатысты екенін айтты.
Еске салайық, Kloop сайтының орыс тіліндегі нұсқасы 2023 жылғы 12 қыркүйекте, ал қырғыз тіліндегі нұсқасы қарашаның басында бұғатталған еді. Қырғызстан Мәдениет министрлігінің мәлімдемесі бойынша, сайт «Саясаткер Равшан Жээнбеков тергеу изоляторында азапталып жатқанын мәлімдеген» деген материалына байланысты бұғатталған. Ұлттық қауіпсіздік мемлекеттік комитеті бұл материал «шындыққа жанастпайды және ҰҚМК беделіне нұқсан келтіреді» деп, сайтты бұғаттап, және материалды алып тастады.