Қазақстанда дәрілік заттар мен медициналық бұйымдарды жарнамалауға қатысты жаңа ереже енгізілді, бұл оларды тиімді пайдалануға ықпал етеді және өз кезегінде жарнамаланатын тауарлар туралы расталған мәліметтерді қамтиды
Заң бойынша, дәрілік заттар мен медициналық бұйымдар жарнамасының мазмұнын Дәрілік заттарды сараптау ұлттық орталығы жіті бақылайды.
БАҚ-та жарнаманы жіберер алдында өндірушілер немесе фармзауыт өкілдері жарнамалық роликті тексеру үшін сараптау ұйымына — Дәрілік заттар мен медициналық бұйымдарды сараптау ұлттық орталығына (ДЗСҰО) тапсыруы тиіс. Ол үшін құжаттар ДЗСҰО-ның Өтініш берушілерге қызмет көрсету орталығына ұсынылады.
«Құжаттарды сараптама жасау ұйымына тапсырғаннан кейін тексеру мерзімі 10 жұмыс күнін құрайды. Егер олар жарнаманы жүзеге асыру қағидаларының талаптарына сәйкес келмейтінін анықтаса, өтініш берушіге түзетулер туралы ескерту хат жіберіледі. Егер хатқа жауап келмесе немесе талап етілетін түзетулер енгізілмесе, қорытынды берілмейді. Жыл сайын жарнама материалдарын бағалау бойынша 650-ден астам қорытынды береді», — деп хабарлады ДЗСҰО.
Дәрілік препараттар мен медициналық бұйымдардың жарнамасында тауарларды тиімді пайдалануға ықпал ететін толық және расталған мәліметтер болуы тиіс. Бұл ҚР Денсаулық сақтау министрлігінің дәрілік заттар мен медициналық бұйымдарды жарнамалауды жүзеге асыру ережелері туралы жаңартылған бұйрығымен бекітілген.
Бұдан басқа, жарнама препараттың фармакологиялық қасиеттері мен емдік көрсеткіштерін және медициналық бұйымдарды қолдану аясын тұтынушылардың сенімін теріс пайдалану арқылы асыра көрсетпеуі керек. Жарнамаланатын дәрі-дәрмектер мен медициналық бұйымдарды басқа тауарлармен салыстыруға болмайды.
Бұл ретте дәрі-дәрмек жарнамасында саудалық атауы, халықаралық патенттелмеген атауы немесе құрамындағы белсенді компоненттері туралы мәліметтер ғана емес, сонымен қатар қолдануға және қарсы көрсетілімдері, жағымсыз әсері, қолдану тәсілі мен дозалары, сатылу шарттары, балаларға, жүкті әйелдерге, сондай-ақ бала емізу кезінде қолдануға қатысты нұсқау болуы тиіс. Сондай-ақ тіркеу куәлігінің нөмірі мен берілген күні, тіркеу мерзімінің өтетін күні, өндірушінің немесе Қазақстандағы сауда өкілінің атауы мен мекенжайы міндетті түрде көрсетіледі.
Медициналық бұйымдардың жарнамасында сауда атауынан басқа, қолданудың негізгі көрсетілімдері, жанама әсерлері мен қарсы көрсетілімдері, өндірушінің немесе Қазақстандағы өкілдің атауы мен мекенжайы, тіркеу куәлігінің нөмірі мен берілген күні және тіркеу мерзімінің өтетін күні көрсетіледі. Міндетті түрде «Өз бетімен емделу денсаулығыңызға зиянды болуы мүмкін» ескерту мәтіні болуы тиіс.