Алматының орталығында, Ресей консулдығы ғимаратының жанында полиция қызметкерлері жас қызды ұстады. Ол Владимир Путинге қарсы наразылық білдіріп, оған өлім тілеген парақшалар таратты. Оның ұсталғаны көрінетін видеоны белсенділер Instagram-да жариялады.
Сол күні полиция қызметкерлері белсенді Александра Ушакованы «заңсыз митинг ұйымдастырғаны» үшін ұстады. Ол әлеуметтік желіде оппозиция өкілі Алексей Навальныйдың қайтыс болуына байланысты Ресей елшілігінің алдында митинг өткізу туралы ақпаратты жариялады, сондай-ақ саяси қастандыққа қатысты наразылық білдірді.
«Саяси қастандық болмауы керек және оған қарсы күресу керек», — деп жазды Ушакова.
Ресей билігі 16 ақпанда Кремль сыншысы Алексей Навальныйдың қайтыс болғанын жариялады. Оппозиционер Ямало-Ненец автономиялық округіндегі түрмеде қайтыс болды. Ресми дереккөздерден алынған ақпаратқа сәйкес, серуендеуден кейін Навальный есінен танып құлаған. Оқиға орнына келген дәрігерлер оның қайтыс болғанын анықтады.