2021 жылы Қазақстан қағаз анықтамаларды толығымен алып тастайды. Мұндай қорытындыға Премьер-министр Асқар Маминнің төрағалығымен өткен мемлекеттік қызметтерді көрсету процестерін жетілдіру мәселелері қаралған үкімет отырысында қол жеткізілді.
Цифрлық даму, инновациялар және аэроғарыш өнеркәсібі министрі Б. Мусин, Еңбек және халықты әлеуметтік қорғау министрі Б. Нұрымбетов, Нұр-Сұлтан қаласының әкімі А. Көлгінов, Атырау облысының әкімі М. Досмұхамбетов, Алматы облысының әкімі А. Баталов баяндама жасады.
Ағымдағы эпидемиологиялық ахуал жағдайында бизнес-процестерді оңтайландыру және автоматтандыру бойынша жұмыс жүргізілетін ЦДИАӨМ, ХҚКО-лардың жұмыс форматы өзгертілді, артық құжаттардың талаптары алынып тасталды. Тиімді шаралардың бірі Blockchain технологиясын енгізу болды, бұл мемлекеттік қызмет көрсету уақытын айтарлықтай қысқартады және деректерді үшінші тұлғаларға беру мүмкіндігін болдырмайды.
ҚР Мемлекеттік қызмет тізілімінде 698 мемлекеттік қызмет түрі қарастырылған, оның 85,5% онлайн-режимде көрсетіледі. Ағымдағы жылдың соңына дейін бұл көрсеткіш 90%-ға дейін жеткізіледі.
Ағымдағы жылы eGov пайдаланушыны биометрикалық сәйкестендіру арқылы тіркеудің оңайлатылған тетігін бір қадамға енгізеді. Осылайша, ұялы телефонды бетке жақындату арқылы eGov-қа тіркелуге болады, ал биометрикалық сәйкестендіру қосымша сұрақтар қою арқылы пайдаланушыны өз бетінше анықтап, тіркейді. Азаматтардың автомобильдерді тіркеу үшін арнайы ХҚКО-да жүруіне балама банктік қосымшалар арқылы сатып алу-сату рәсімделеді, бұл қызмет көрсету уақытын 10 минутқа дейін қысқартады (құжаттар үйге жеткізіледі).
Жыл соңына дейін әлеуметтік-еңбек саласындағы мемлекеттік қызметтер көрсеткіші 90%-ға дейін жеткізіледі.
Қоғамдық мониторинг қорытындысы бойынша электрондық мемлекеттік қызметтерді енгізу бойынша неғұрлым прогрессивті өңірлер — Ақмола, Қызылорда, Қарағанды, Қостанай және Батыс Қазақстан облыстары. Бұл жұмыс Алматы облысы мен Шымкентте тиісті деңгейде жүргізіліп жатқан жоқ.
Үкімет басшысы жергілікті атқарушы органдарға мемлекеттік қызмет көрсету сапасына қанағаттану деңгейін кемінде 80%-ға арттыруды, сондай-ақ IQala елордалық жобасының үлгісімен ТКШ қызметтері бойынша тиімді шешімдерді енгізуді тапсырды.
Цифрлық даму министрлігіне мүдделі мемлекеттік органдармен бірлесіп, барлық әлеуметтік маңызды мемлекеттік қызметтерді eGov mobile-ге көшіру жоспарын бекіту туралы тапсырма берілді.
Халыққа сіздің жұмысыңыздың нақты нәтижелері қажет. Біз 2021 жылы «қағаз» анықтамаларды толық алып тастауға, «Азаматтарға арналған үкімет» корпорациясынан қызметтерді жеткізуді енгізуге және барлық онлайн қызметтер мен сервистердің қолжетімділік деңгейін 100%-ға дейін арттыруға тиіспіз, — деді Мамин.
Денсаулық сақтау министрлігіне азаматтарға қажетті электрондық медициналық мәліметтерді ұсынуды қамтамасыз ету, Еңбек министрлігіне мемлекеттік органдармен бірлесіп зейнетақы мен жәрдемақы төлемдерін тағайындау процестерін цифрландыру үшін қажетті деректерді толық цифрландыруды және өзектендіруді қамтамасыз ету тапсырылды.
Премьер-Министр орталық және жергілікті атқарушы органдарға барлық ақпараттық жүйелердің тиімді интеграциясы мен үздіксіз жұмысын қамтамасыз етуді, олардың жұмыс сапасын және халық үшін пайдаланудың жеңілдігін арттыру бойынша шаралар қабылдауды тапсырды.
Үкімет басшысы мемлекеттік қызметтерді цифрландыру саласындағы жаңалықтар бойынша түсіндіру жұмыстарын жүргізу қажеттігіне ерекше назар аударды.