Түркістан облысының бітіруші сынып оқушылары үшін қашықтықтан оқуты үшінші тоқсанда аяқталады. Демалыстан кейін 11 сынып оқушылары дәстүрлі форматта оқитын болады.
Өңірдегі оқушыларды оқыту ІІІ тоқсанда қашықтықтан жүргізіледі. Бітіруші сыныптар санитарлық талаптарды сақтай отырып штаттық режимде оқитын болады. Бұл туралы облыстық адами әлеуетті дамыту басқармасы басшысының орынбасары Ардақ Мәдиханқызы Өңірлік коммуникациялар қызметінде өткен брифингте мәлім етті, деп хабарлайды “Қазақпарат” агенттігі.
9 бен 11-сынып оқитын өңірдегі 66 401 оқушы негізгі пәндердің 70%-ын (математика, тілдер, физика, химия, тарих, география, биология, дене шынықтыру) штаттық режимде, 30% (информатика, құқық негіздері, өзін-өзі тану, еңбек) қашықтықтан білім алуды жалғастырады. Сондай-ақ, мектеп әкімшілігінің шешімімен сабақтан тыс уақытта үлгерімі төмен 5 адамнан аспайтын топтарда дайындық сабақтары өткізіледі.
“Облыс аумағындағы 918 мектепте 24 317 компьютер қолдануға жарамды. Жалпы аймақта 499 975 оқушы бар, мектептерде компьютерлік техникаға деген қажеттілікті жою үшін Үкімет резервінен 57 190 (7711 планшет, 5952 компьютер, 43 527 ноутбук) компьютерлік құрылғы сатып алынды”, – деді ол.
Жалпы мектеп қорларынан оқушыларға 24 317 компьютер, жергілікті бюджет есебінен 1539 компьютерлік құрылғы, “Мектепке жол” акциясы аясында демеушілер есебінен 1445 компьютер құрылғысы берілді. Ноутбуктер мен компьютерлер аудандар мен қалалардың білім бөлімдеріне жеткізілді.
Қазір облыстың аудандық және қалалық білім беру мекемелерінде де қазіргі проблемаларды шешу жолдары пысықталуда. Қажетті қаражат 2021 жылдың қаражаты есебінен қарастырылып, есепшоттарына аударылатын болады. Аталған мәселелер Кентау қаласында, Сайрам, Сарыағаш және Келес аудандарында қаралады.
