Қазақстан Премьер-Министрі Әлихан Смайылов елдің салық жүйесіндегі елеулі өзгерістер туралы мәлімдеді. Инвестициялық ахуалды жақсарту кеңесінің отырысында салық есептілігі 30%-ға қысқарту және инвесторларға салық төлемдерін 20%-ға азайту арқылы жеке шарттармен келісімшарт жасасуға мүмкіндік беруге ниетті екенін хабарлады.
Премьер-министрдің айтуынша, Қолданыстағы ынталандыруларды сақтай отырып, жаңа Салық кодексі шеңберінде салық төлеушіге бағытталған сервистік әкімшілендіру моделі енгізіледі. «Салық есептілігі 30%-ға, ал салық төлемдерінің саны 20%-ға қысқарады», — деп атап өтті Смайылов.
Ол бөлшек салық режимін қолдану бойынша қызмет түрлері екі есеге кеңейтіліп, 1 млн-нан астам салық төлеушіні қамтитынын айтты. Бұдан бөлек, өңдеу өнеркәсібіндегі жаңа жобалар 3 жылға салықтан босатылады.
Премьер инвестициялар тарту – экономикалық өсудің негізгі факторларының және Үкімет жұмысының басымдықтарының бірі болып қала беретінін атап өтті. Инвестициялық шарттардың жаңа механизмі және салық заңнамасының тұрақтылығына кепілдік беру сияқты қосымша шаралар инвесторларды ынталандыруға бағытталған.
Резидент емес тұлғалардан алынған материалдық емес қызметтер үшін шегерім сомасын шектеуге қатысты инвесторлар жиі көтеретін мәселе шешілді. Енді бұл шектеу тек оффшорлық юрисдикциялардағы компаниялармен жүргізілген операцияларға қатысты болады.
Сондай-ақ қабылданған шаралар нәтижесінде Қазақстан IMD әлемдік бәсекеге қабілеттілік рейтингінде бір жыл ішінде 6 сатыға көтеріліп, 37-орынға табан тірегені атап өтілді.