ҚР Еңбек және халықты әлеуметтік қорғау министрлігі Шымкенттегі №2 Арнаулы әлеуметтік қызмет көрсету орталығында жоспардан тыс тексеру жүргізді. Бұл туралы ведомствоның баспасөз қызметі хабарлады.
Тексеру жұмыстары жергілікті тұрғын Әлия Мамутованың мәлімдемесінен кейін басталды. Ол өзінің І топтағы мүгедек қызына мекеме қызметкерлері жүкті болып қалмау үшін жасырын түрде спираль қойып, жеті жыл бойы зорлап келген деп мәлімдеді.
Тексеру барысында қызмет алушылардың құқықтарының бұзылу фактілері және орталықтың қызметін ұйымдастыруда кемшіліктері анықталды:
- бірнеше палаталарда жатын алаңдар белгіленген нормаларға сәйкес келмейді, тиісті 5 шаршы метр алаңның орнына қызмет алушыға 3-ден 4,5 шаршы метрге дейін келеді;
- кейбір қызмет алушылардың жеке жұмыс жоспарлары оңалтудың жеке бағдарламасы ескерілмей әзірленген;
- қызмет алушылар жұмсақ инвентарьмен және киіммен толық көлемде қамтамасыз етілмеген;
- қызмет алушылардың киімінің маркировкасы жоқ;
- асхана, ас бөлмесі, азық-түлік қоймасын тексеру кезінде бірқатар бұзушылықтар анықталды.
«Бұзушылықтар орталықтың лауазымды тұлғаларында тиісті бақылаудың жоқтығын көрсетеді, ас блогында және басқа да үй-жайларда антисанитариялық жағдайлардан қызмет алушылардың жаппай жұқтыру қаупі бар.», — делінген хабарламада.
Сондай-ақ, 2020 жылы Еңбек және халықты әлеуметтік қорғау министрлігінің жұмыс тобының мүшелері объектіге бару барысында берген ескертулерге мекеме басшылығының әрекетсіздігі және әлсіз әрекет етуі атап өтілді. Арнайы әлеуметтік қызмет көрсету бойынша бұзушылықтар жойылмаған.
Тексеру нәтижелері бойынша Шымкент қаласының әкімдігіне Еңбекминінен біліктілік талаптарын ескере отырып, орталық директоры Мырзахан Жолтаевты атқаратын лауазымынан босату және мекеме басшысын қоғамның белсенді өкілдері қатарынан тағайындау туралы мәселені қарау жөнінде ұсыныс жіберілді.