Синоптиктердің болжамы орындалды. 16 ақпанда таңертең Алматыда қар жауды. «Қазгидромет» РМК мамандары Zakon.kz сайтына оның қашан аяқталатынын айтты.
«Қазгидромет» РМК Алматы қаласы және Алматы облысы бойынша филиалының синоптик-инженері Дәулет Қисебаев та кеше дауылды ескерту жарияланғанын еске салды.
«Таңертең және күндіз жаңбыр жауып, соңы қарға айналады деп болжанған еді. Аэропорт аймағында қатты жауын-шашын таңғы сағат 6-да басталды. Ал үш сағаттың ішінде жаңбыр қарға айналды», — деп хабарлады Қисебаев.
Ол қалада қар 17 ақпан түнгі 2-3-ке дейін жауады. Ал одан кейін ауа райы жауын-шашынсыз, ауа температурасының төмендеуі болжанатынын айтты.
Айта кетейік, жауған қар қаладағы көлік қозғалысын тоқтатқан. Оңтүстік астана әкімдігі атап өткендей, мегаполистің коммуналдық қызметтері күшейтілген жұмыс режиміне көшірілді.