Алматы облысында полиция қызметкерлері жүргізген арнайы операция барысында облыс аумағында бірқатар ұрлық жасады деген күдікпен қылмыстық топ ұсталды.
Талдықорғанның бес тұрғыны бірқатар ұрлық жасады деген күдікке ілінді
Полиция департаментінің баспасөз қызметі қаланың өзінен және облыстың екі ауданында жеке үйлерден 12 ұрлық жасаған Талдықорғанның бес тұрғыны туралы хабарлады. Қылмыстар ағымдағы жылдың қазан және қараша айларында жасалған.
«Бұл фактілер бойынша полицейлер Талдықорған қаласының 22-29 жас аралығындағы тұрғындарынан құралған 5 адамнан тұратын топты әшкереледі. Олар кінәсін мойындады. Тергеу барысында олардан тұрмыстық техника, қымбат киімдер және қылмыстық жолмен ұрланған өзге де мүліктер тәркіленді. Ұрланған заттардың бір бөлігі тергеу әрекеттері кезінде сатып алушылардан тәркіленді», — делінген хабарламада.
Ұсталғандардың үшеуі бұған дейін істі болған, олар біреудің мүлкін ұрлап, алаяқтық жасағаны үшін сотталған. Күдіктілердің басқа да осыған ұқсас қылмыстарға қатысы бар-жоғын тексеріп жатыр.
Сот төрт күдіктіге қатысты қамауда ұстау түріндегі бұлтартпау шарасын таңдады. Біреуі босатылды, бірақ ол бірінші талап бойынша құқық қорғау органдарына келуге міндеттелді.