Қазақстан Ұлттық банкі қазақстандықтарды инвестициялық алаяқтық қаупі туралы ескертіп, барынша қырағы болуға шақырады. Қаржы институты атап өткендей, алаяқтар «оңай» жолмен қомақты ақша табуға уәде береді.
Ұлттық банк мәлімдемесінде аңқау азаматтарды ақша қаражатын салуға шақырып, инвестициядан қомақты қаржылық пайда табуға уәде беретіні атап өтілген. Алаяқтар жалған лицензиялар мен басқа да құқық белгілейтін құжаттарды, оның ішінде Қазақстан Ұлттық Банкі атынан берілгенді көрсететін жалған құжаттарды жариялайды.
Алаяқтар әлеуметтік желілер мен мессенджерлерді пайдалана отырып, азаматтарды инвестициялауға шақырады және орасан зор пайда табуға уәде береді. Алайда қаражатты аударғаннан кейін алаяқтар ізім-ғайым жоқ болып кетеді.
Ұлттық банк алаяқтықтың құрбаны болғандарды полицияға жүгінуге, ал кеңес алу үшін 1477 қысқа нөмірі бойынша байланыс орталығына хабарласуға шақырады. Сақ болыңыз және ұсынылатын инвестициялар туралы ақпаратты мұқият тексеріңіз.