Қазақстан өткен айда шетелге 862 мың тонна астық пен бидай ұнын сатқан. Мемлекеттік кірістер комитетінің деректеріне сәйкес жалпы көлемнен экспортталған бидай ұнының саны 164 мың тоннаны (235 мың тонна астық эквивалентінде) және 9,7 мың тонна арпаны құрайды.
Бидай мен ұнның басым бөлігін Өзбекстан (327,6 мың тонна), Ауғанстан (230,3 мың тонна) және Тәжікстан (150,5 мың тонна) сатып алды. Арпаның барлық көлемін дәстүрлі түрде Иран сатып алды.
Бұған дейін ауыл шаруашылығы министрі Сапархан Омаров ағымдағы жылы Қазақстан диқандары жоғары сапасымен ерекшеленетін астық өнімін алғанын және коронавирус пандемиясына қарамастан, астық пен ұн сату мәселелеріндегі Қазақстанның экспорттық стратегиясы өзгеріске ұшырамайтынын атап өткен болатын.
Сонымен қатар, ел аумағында малдар мен құстарға жем-шөп үшін сатылатын бидай мен арпаның құны өткен жылмен салыстырғанда айтарлықтай өскенін атап өткен жөн.
«Биылғы жылы экспорттық әлеует 7-8 млн тонна астық пен астық эквивалентіндегі ұнға бағаланады. Негізгі елдер — біздің дәстүрлі серіктестеріміз: Өзбекстан, Тәжікстан, Қырғызстан, Түрікменстан, Ауғанстан, Иран. Қытайға астық пен ұн экспортының көлемін ұлғайтуды жоспарлап отырмыз. Биыл, мен айтқанымдай, біз 18 миллион тонна астық жинауды жоспарлап отырмыз — негізінен астықтың бұл көлемі осы нарықтарға кетеді», — деп нақтылады Сапархан Омаров.
Айта кетейік, АӨК дамыту жөніндегі ұлттық бағдарлама тұжырымдамасының жобасы 2021 жылдың мамырына қарай дайын болады. Құжатты әзірлеуді Президент бақылайтын болады.