АҚШ мемлекеттік хатшысының бірінші орынбасары Стивен Бигэн Корея Республикасына барады. Сапар барысында Солтүстік және Оңтүстік Корея қарым-қатынастары мен өңірлік қауіпсіздік мәселелерін талқылау жоспарлануда.
«Ол АҚШ пен Корея Республикасының одағы мен Үндістан-Тынық мұхиты өңіріндегі өңірлік қауіпсіздікке, тұрақтылық пен гүлденуге деген ортақ ұстанымымды, сондай-ақ Солтүстік Корея бойынша тығыз үйлестіруді жалғастыру мәселесін талқылау үшін Корея Республикасының ресми тұлғаларымен кездеседі», — делінген хабарламада.
2018 жылғы маусымда алғаш рет Сингапурда АҚШ пен КХДР-ның саммиті өтті, оның қорытындысы бойынша бірлескен құжат қабылданды. Сол кезде Пхеньян Вашингтон тарапынан қауіпсіздік кепілдігіне айырбастау үшін Корей түбегін денуклеаризациялау бойынша міндеттеме алды. КХДР мен АҚШ-тың екінші саммиті 2019 жылдың ақпан айында Ханойда өтті. АҚШ президенті Дональд Трамп пен КХДР жетекшісі Ким Чен Ын бірнеше кездесуден, соның ішінде бетпе-бет кездесуден кейін келісімге келе алмай, бірлескен құжатқа қол қоймады. 2019 жылғы 30 маусымда Трамп пен Ким Чен Ын арасында КХДР мен Корея Республикасының шекарасындағы қарусызданған аймақта үшінші кездесуі өтті.
Өткен жылдың 5 қазанында АҚШ пен КХДР өкілдері Швецияда жұмыс деңгейінде кездесті, бірақ бұл келіссөздер нәтижесіз аяқталды. КХДР делегациясының басшысы Ким Мён Гиль келіссөздердің сәтсіз аяқталғанын мәлімдеп, америкалық тарапқа өз ұстанымын жақсырақ ойластыруға кеңес берді. АҚШ Мемлекеттік департаменті мұндай бағамен келіспей, кездесуді сындарлы деп атады.