Ақ үй ресейлік «Солтүстік ағын» газ құбырларындағы жарылыстарға АҚШ-тың қатысы жоқ деп мәлімдеді.
Құрама Штаттар «Солтүстік ағын» және «Солтүстік ағын — 2» газ құбырларындағы жарылыстарға тікелей де, жанама да қатысы жоқ. Бұл туралы жексенбі күні Fox News телеарнасының эфирінде Ақ үйдің Ұлттық қауіпсіздік кеңесіндегі (ҰҚК) стратегиялық коммуникациялар жөніндегі үйлестірушісі Джон Кирби мәлімдеді.
«Құрама Штаттар бұған ешқандай қатысы жоқ», — деп Кирби жүргізушінің тиісті сұрағына жауап берді және америкалық журналист Сеймур Херштің мақаласы «шындыққа жанаспайтынын» атап өтті.
8 ақпанда журналистік зерттеу жүргізумен айналысатын Херш өз мақаласында дереккөзге сілтеме жасап, ресейлік газ құбырларының астына жарылғыш заттарды 2022 жылдың маусым айында АҚШ Әскери-теңіз күштері «Балтопс» оқу-жаттығуында норвегиялық мамандардың қолдауымен салғанын мәлімдеді. Херштің мәліметінше, операцияны өткізу туралы шешімді АҚШ Президенті Джо Байден ұлттық қауіпсіздік мәселелерімен айналысатын әкімшілік өкілдерімен тоғыз ай талқылаудың қорытындысы бойынша қабылдаған.