Нұрбақыт Әбдіғалиұлы Бөкебаев Абай атындағы Қазақ Ұлттық академиялық опера және балет театрының директоры болып тағайындалды. Бұл туралы ҚР Мәдениет және спорт министрлігі хабарлады.
«ҚР Мәдениет және спорт министрінің бұйрығымен Нұрбақыт Әбдіғалиұлы Бөкебаев Абай атындағы Қазақ Ұлттық академиялық опера және балет театрының директоры қызметіне тағайындалды», — делінген хабарламада.
Нұрбақыт Бөкебаев 1963 жылы дүниеге келген. Ж. Елебеков атындағы республикалық эстрада-цирк колледжін, Т. Жүргенов атындағы Қазақ ұлттық өнер академиясын, Д.А. Қонаев атындағы Университеттің заң факультетін тәмамдаған.
Мәдениеттану мамандығы бойынша философия докторы.
Әр жылдары «Қазақконцерт» концерттік ұжымдарының жетекшісі, ҚР Мәдениет министрлігінің бас маманы, Елебеков атындағы Республикалық эстрада-цирк колледжінің және Жүргенов атындағы Қазақ мемлекеттік театр және кино институтының оқытушысы қызметтерін атқарды.
1998-2000 жылдары Жүргенов атындағы Қазақ мемлекеттік театр және кино институтының проректоры, 2000-2004 жылдары Алматы қаласы Бостандық ауданының ішкі саясат бөлімінің бастығы, 2004-2005 жылдары Қазақстан халқы кіші Ассамблеясы хатшылығының меңгерушісі, 2005-2008 жылдары Алматы ішкі саясат департаментінің бөлім бастығы қызметтерін атқарды.
2008-2010 жылдары — ҚР Мәдениет және ақпарат министрлігі өнер басқармасының бастығы, 2010-2012 жылдары — Мүсірепов атындағы Қазақ мемлекеттік академиялық балалар мен жасөспірімдер театры директорының орынбасары, 2012-2016 жылдары — Абай атындағы Қазақ мемлекеттік академиялық опера және балет театры директорының бірінші орынбасары.
2016 жылдан «Қазақ мемлекеттік циркі» КМҚК директоры.