Алматыда жер сілкінісіне байланысты метрополитен жұмысы уақытша жабылды, деп хабарлады метрополитеннің баспасөз қызметі. Аталған шешім тоннельдерді тексеру жұмыстарын жүргізу мақсатында қабылданды.
«Метрополитен мамандары қозғалыс қауіпсіздігін қамтамасыз ету мақсатында тоннельдерді тексеру жұмыстарын бастады. Біз метро жұмысын ТЖД-дан жұмыс орындарына кіруге рұқсат алғаннан кейін үш сағат ішінде қайта жалғастыруды жоспарлап отырмыз. Толық ақпарат ТЖД-дан ұсыныстар алғаннан кейін беріледі», — делінген метрополитен баспасөз қызметінің ресми мәлімдемесінде.
Қазіргі уақытта тоннельдерде қираулар тіркелген жоқ, алайда барлық жолаушылардың қауіпсіздігін қамтамасыз ету мақсатында эвакуация жүргізілді. Тексеру жұмыстары аяқталғаннан кейін метрополитен жұмысын қалпына келтірілгені туралы ақпаратты жіберіп алмау үшін жаңалықтарды қадағалаңыздар.