Sailau Talks-2021 сарапшылық кездесуінде партиялық тізімдерде әйелдер үшін 30% квота енгізу және әйелдердің саяси үдерістерге қатысуы туралы пікірлер айтылды.
“Мемлекеттік қызметте жұмыс істейтіндердің 56% – әйелдер. Оның ішінде 41% басшы ретінде қызмет атқарады. Яғни, әйелдердің өздерін саяси жағынан, заң шығарушы органда жақсы қырынан көрсетуге мүмкіндігі бар”, – деді Қазақстан қоғамдық даму институты жанындағы “Рухани жаңғыру” орталығының жетекшісі Жанар Бұқанова.
Қазақстан стратегиялық зерттеулер институтының бөлім басшысы Алуа Жолдыбалинаның айтуынша, халықаралық тәжірибе бойынша квота бөлудің екі тетігі бар.
“Кейбір мемлекеттер квота белгілесе, басқа мемлекеттер партиялық квота белгілейді. Біз екінші жолмен кетіп, партиялық квота енгіздік. Қазіргі таңда партиялық квотаны Германия қолданады. Сайлау квотасын көп жағдайда скандинавиялық елдер қолданады. Олар парламентке өткендер тізімінде әйелдердің 30% болуын талап етеді, яғни олар бізден озып кетті.
Біз квотаның нәтижесін бір жылдан кейін ғана біле аламыз. Үмітіміз көп, бірақ нәтижені бір жылдан кейін ғана көреміз. Сонда біз қанша әйелдің қандай заң шығару процестеріне қатысқанын анықтай аламыз”, – деп атап өтті А.Жолдыбалина.
