19 желтоқсанға қараған түні Қытайдың солтүстік-батысындағы Ганьсу провинциясында жойқын жер сілкінісі салдарынан 11 адам қаза тапты. Жер сілкінісінің салдарын жою жөніндегі жергілікті штабтың ақпаратына сәйкес, Ганьсу мен көршілес Цинхай провинциясында 111 адам зардап шекті.
Қытайдың сейсмологиялық желілер орталығының мәліметі бойынша, жер сілкінісі жергілікті уақыт бойынша 23.59-да болды, гипоорталық 10 шақырым тереңдікте орналасқан. Жер асты сілкіністерінің ошағы Цзишань округінің әкімшілік орталығынан шамамен 8 шақырым қашықтықтағы Люгоу ауылында орналасқан.
Куәгерлер үйлер, жолдар және басқа да инфрақұрылым нысандарының қирағанын айтып отыр. Бірнеше ауылда электр және сумен жабдықтауда проблемалар туындап отыр.
Зілзаладан кейін апат аймағына 580 құтқарушы, 88 өрт сөндіру машинасы, 12 іздестіру иттері, сондай-ақ іздестіру-құтқару операцияларын жүргізу үшін 10 мыңнан астам жабдық жинағы жіберілді. Жер сiлкiнiсi болған аймақта жолаушылар мен жүк пойызының қозғалысы тоқтатылды, ал жергiлiктi темiржол басшылығы пойыз қозғалысының қауiпсiздiгiн қамтамасыз ету үшiн темiржолдарға толық тексеру жүргiзудi тапсырды.
Қытай Халық Республикасының Төрағасы Си Цзиньпин көңіл айтып, зардап шеккендерді іздестіру мен құтқару жұмыстарын ұйымдастыруға барынша күш салуға шақырды. Ол сондай-ақ адамдардың өмірі мен мүлкіне төнген қауіпті барынша азайту үшін адамдарды эвакуациялау мен олардың қауіпсіздігін қамтамасыз ету маңызды екенін атап өтті.