Қазақстан сенаторлары Қырғызстанмен әскери көмек көрсету туралы келісімге қол қойды. Құжатқа сәйкес, еліміз бауырлас елге әскери техника мен атыс қаруын жеткізеді.
«Орталық Азияға іргелес аудандардағы қауіпсіздік саласындағы күрделі жағдайдың , сондай-ақ өңірлік қауіпсіздікке төнген қауіп-қатердің өршуіне байланысты әскери-техникалық көмек көрсету Қырғызстан Қарулы Күштерінің осы қауіп-қатерге тойтарыс беруіне және бүкіл Орталық Азия аймағының қауіпсіздігін нығайту мүмкіндіктерін күшейтуге мүмкіндік береді», — делінген ҚР Қорғаныс министрі орынбасарының баяндамасында.
Қазақстан әскери техниканы Қырғыз Республикасының Қой-Таш елдімекеніне дейін автомокөлікпен жеткізеді және шығынды өзі көтереді.
Өз кезегінде қырғыз тарапы алынған әскери мүлікті қауіпсіздікті қамтамасыз ету мақсатында ғана пайдаланады, үшінші тарапқа бермейді және ТМД-ға қатысушы мемлекеттерге қарсы пайдаланбайды.
