Тоқаев ЕО-ның Орталық Азия жөніндегі арнаулы өкілімен кездесті

Қазақстан Президенті Қасым-Жомарт Тоқаев Нұр-Сұлтанда ЕО-ның Орталық Азия жөніндегі арнайы өкілі Тери Хакала кездесті.

Бұл туралы Ақорданың баспасөз қызметі хабарлады.

«Мемлекет басшысы Еуропа Одағының Орталық Азия жөніндегі арнаулы өкілі Тери Хакаламен бейнебайланыс режимінде кездесу өткізді. Кездесу барысында Қазақстан мен Еуропа Одағы арасындағы серіктестіктің өзекті мәселелері талқыланды», — делінген бейсенбіде хабарламада.

Қасым-Жомарт Тоқаев Қазақстанның маңызды серіктестерінің бірі Еуропа Одағымен көпжақты ықпалдастықты дамытуға мүдделі екенін нақтылап, екіжақты стратегиялық ынтымақтастыққа тың серпін беруге дайын екенін жеткізді.

Өз кезегінде Тери Хакала Президентті референдумның сәтті өтуімен құттықтап, Брюссельдің Орталық Азия аймағындағы жетекші серіктесі Қазақстанмен ұзақ мерзімді ынтымақтастық пен ықпалдастықты жалғастыруға Еуропа Одағының бейілді екенін нақтылады. Сонымен қатар ол Еуропа Одағы Мемлекет басшысының реформалар  жүргізу бағдарламасына жан-жақты қолдау көрсететінін, Қазақстанның көпвекторлы және теңгерімді сыртқы саясатын жоғары бағалайтынын мәлімдеді.

«Еуропа Одағы Қазақстанмен көлік-логистикалық байланыстарды нығайтуға зор қызығушылық танытты. Бұдан бөлек олар өңірлік және жаһандық күн тәртібіндегі өзекті мәселелер жөнінде жан-жақты пікір алмасты», — делінген хабарламада.

Добавить комментарий