Қазақстан Президенті Қасым-Жомарт Тоқаев ұлттық газ компаниясы қызметінің негізгі тұстарын талқылау үшін QazaqGaz басқарма төрағасы Санжар Жаркешовты қабылдады. Мемлекет басшысына 2023 жылдағы атқарылған жұмыстар туралы есеп берілді, ол алдағы кезеңге арналған стратегиямен танысты.
Кездесу аясында «QazaqGaz» компаниялар тобы өңірлерді дамыту үшін әлеуметтік-экономикалық маңызы бар ірі газ құбырларын тартып, іске қосқан, олардың құны 400 миллиард теңгеден асады. Аталған инфрақұрылымдық жобалар өңірлердің әлеуметтік және экономикалық дамуына ықпал етеді.
Санжар Жаркешов қабылданған шаралардың арқасында еліміздің ішкі нарығына газ жеткізу көлемі 19 пайызға ұлғайғанын айтты. Елді газдандыру да басымдыққа ие және былтыр 11 өңірде жүзден астам елді мекен газбен жабдықтау жүйесіне қосылып, 200 мыңнан астам адам газбен қамтамасыз етілді.
Бұдан бөлек, Президентке жаңа «Анабай» газ кен орнын пайдалануға беру жөнінде ақпарат берілді. Компания газдың ресурстық базасын дамыту бойынша белсенді жұмыстарды жалғастыруда. Жаркешовтың айтуынша, ауа райы күрт суытып, газ тасымалдау жүйесіне шектен тыс жүктеме түскен кезде ішкі нарықтың сұранысын толықтай өтеп, тұрғындарды көгілдір отынмен үздіксіз қамтамасыз еткен.