ШҚО-да мас күйінде болған күдікті ер адам өзінің танысы Өскемен ГЭС-ке “бомба қойды” деп хабарлады.
“Осы жылдың қаңтар айының басында Глубокое ауданындағы “102” жедел арнасына 56 жастағы ер адам хабарласып, оның танысы Өскемендегі ГЭС-ке бомба қойғанын айтты. Жедел түрде полиция қызметкерлері мен тиісті органдар аталған жерді тексерді”, – делінген ШҚО ПД баспасөз қызметінің хабарламасында.
Оқиға орнына шыққан мамандар жарылғыш құрылғыларды анықтаған жоқ деп атап өтілді.
“Сотқа дейінгі тергеу барысында екі ер адамның спирттік ішімдікк сылқия тойып, өз арасында сөзге келіп қалғаны анықталды, кейін жанжалдасқанның біреуінде қылмыстық ниет туындайды. Мас ер адам өз әрекетімен жауапкершілікке тартылатынын жете түсінбей, құқық қорғау органдарына жалған ақпаратпен жүгінді”, – деді ШҚО ПД басшысы Сағат Мәдиев.
Осы факті бойынша ҚР ҚК 273-бабы (терроризм актісі туралы көрінеу жалған хабарлама) бойынша сотқа дейінгі тергеу жүргізіледі. Күдікті 5 жылға дейін бас бостандығынан айырылуы мүмкін.
