Ресей Президенті Владимир Путин Украинадағы ұрыс қимылдарына қатысқан шетелдік жалдамалыларға Ресей азаматтығын алуға мүмкіндік беретін жарлыққа қол қойды. Жаңа құжатқа сәйкес, азаматтықты шетелдіктердің өздері ғана емес, жұбайы, балалары мен ата-аналарын қоса алғанда, олардың отбасы мүшелері де ала алады.
Жарлық бойынша әскери қызметке кемінде бір жыл мерзімге келісімшарт жасасқан шетелдіктерге ғана Ресей азаматтығы беріледі. Сондай-ақ Ресей Қарулы Күштерінен денсаулық жағдайына, шекті жасқа толғаннан кейін және басқа да осыған ұқсас жағдайларға байланысты жауынгерлік іс-қимылдар кезеңінде әскери қызметтен кеткен шетелдіктер азаматтық алуға өтініш бере алады.
2023 жылғы мамырда Путин Қорғаныс министрлігімен келісімшарт жасасқан және Украина аумағындағы ұрысқа қатысқан шетелдіктерге азаматтық алуды жеңілдетуді көздейтін жарлыққа қол қойған еді.
Жаңа жарлық Украинадағы ұрыс қимылдары жағдайында бір жыл мерзімге әскери қызметке келісімшарт жасасқан шетелдіктер мен азаматтығы жоқ адамдар үшін жеңілдетілген рәсіммен азаматтық алуды көздейді. Сондай-ақ, олардың отбасы мүшелері үшін жеңілдетілген ережелер қарастырылған. Бұрын келісімшарттың ең қысқа мерзімі шетелдіктер үшін бес жылды болды, ал Ресей азаматтығын алу үшін кемінде үш жыл әскери қызмет ету қажет болатын.
Бұл қадамға байланысты Ресейге мигранттардың ағыны байқалады. Әскерилер базарларда, құрылыс алаңдарында және басқа да қоғамдық орындарда рейдтер жүргізіп, мигранттарға қысымды күшейтуде. Нәпақасын табуға келген көптеген мигранттар Ресей азаматтығын алып, Украинаға қарсы соғысуға аттануы мүмкін.