Словенияның Блед қаласында өтетін XVIII халықаралық стратегиялық форумға әлемнің түкпір-түкпірінен 3000-ға жуық адам қатысады. 28-29 тамыз аралығында өтетін іс-шара «Жаһандық қауіпсіздік жолындағы ынтымақтастық» ұранымен өткізіледі.
Екі күнге созылатын форумда 200-ден астам баяндамашының қатысуымен 32 панельдік пікірталас өткізу жоспарлануда. Шақырылған қонақтардың арасында сегіз премьер-министр, үш президент, Еуропалық кеңес төрағасы, 13 сыртқы істер министрі, сондай-ақ азаматтық қоғамның, халықаралық ұйымдардың өкілдері, бизнесмендер мен ғалымдар бар.
Форумның басты тақырыптарының бірі тамыздың бірінші жартысында толассыз жауған жауын кесірінен Словенияда болған су тасқынының салдарын және осындай қауіп-қатерлер жағдайындағы ынтымақтастықты талқылау болмақ. Сондай-ақ, киберқауіпсіздік мәселелері, жаңа геосаяси дәуірдегі Еуроодақтың рөлі, азық-түлік және энергетикалық қауіпсіздік, климаттың өзгеруі, БАҚ еркіндігі, туризм, адам құқықтары, цифрлық трансформация және Украина мен Батыс Балқандағы жағдай қаралады.
Бұл айтулы оқиға қауіпсіздік пен жаһандық сын-қатер саласындағы халықаралық ынтымақтастықты дамытудағы алға тағы бір қадам болды.