Мамыр айының соңында Сиднейде Quad деп аталатын Төртжақты қауіпсіздік диалогы көшбасшыларының саммиті өтеді. Аустралия, Үндістан, АҚШ және Жапония мемлекет басшылары әлемдік экономика проблемалары мен Үнді-Тынық мұхиты өңірінің даму жолдарын талқылайды. Аустралия Премьер-министрінің мәлімдемесіне сәйкес, саммит жаһандық инфляция жағдайында өңірдің және әлемнің экономикалық проблемаларына, сондай-ақ «төрттік» елдерінің АСЕАН және ҮТМФ секілді регионалды институттармен өңірдегі байланыстарды нығайту және оның дамуын жеделдету үшін өзара іс-қимылына арналады.
Quad 2007 жылы Азия-Тынық мұхиты аймағы мен Үнді мұхиты аймағындағы өзара іс-қимыл механизмі ретінде құрылды. Ол Аустралия, Үндістан, АҚШ және Жапонияның басын қосады. «Төрттік» елдерінің сыртқы саяси ведомстволары басшыларының бірінші кездесуі 2019 жылғы қыркүйекте Нью-Йоркте, ал 2021 жылғы наурызда виртуалды форматта көшбасшылардың бірінші саммиті өтті. 2021 жылдың қыркүйегінде Вашингтонда Quad бірлестігінің алғашқы саммиті ұйымдастырылды. Ақ үйдің мәлімдеуінше, уақыт өте келе АҚШ-тың кейбір одақтастары мен серіктестерінің есебінен Quad мүшелерін ұлғайту жоспарлануда.
Аустралия Премьер-министрі Энтони Альбанезе «төрттік» елдері Үндістан-Тынық мұхиты аймағының табысты болуына мүдделі екенін және барлық елдер үшін егемендік пен қауіпсіздікті құрметтеп, оның инклюзивтілігін, тұрақтылығы мен гүлденуін қолдайтынын хабарлады. Ол сондай-ақ Сиднейде «төрттік» елдерінің көшбасшыларын қарсы алуды асыға күтетінін атап өтті. Бұл — Аустралияда өтетін Quad көшбасшыларының алғашқы саммиті. Кездесу Сидней опера театрында өтеді.