Қазақстан Ұлттық қауіпсіздік комитетінің (ҰҚК) қызметкерлері прокуратура органдарының үйлестіруімен және полицияның көмегімен жүргізген операция барысында әлеуметтік желі арқылы терроризмді насихаттаған күдікті Шымкент қаласының тұрғынын ұстады. ҰҚК баспасөз қызметінің ақпараты бойынша, ұсталған ертеректе ұзақ уақыт бойы алыс шет елдердің бірінде тұрып, радикалды идеологияны қабылдаған.
Қазақстан Қылмыстық кодексінің 256-бабы 2-бөлігі бойынша басталған тергеу материалдарына сәйкес күдікті өзінің қызмет бабын пайдалана отырып, не қоғамдық бірлестіктің көшбасшысы ретінде, не бұқаралық ақпарат құралдары немесе телекоммуникациялық желілер арқылы терроризмді насихаттауға немесе терроризм актісін жасауға жария түрде шақырғаны үшін жауапқа тартылады. Аталған бап 7 жылдан 12 жылға дейiнгi мерзiмге бас бостандығынан айыру түріндегі жазаны көздейді.
Сотқа дейінгі тергеу амалдары барысында күдіктіге қатысты барлық мән-жайлар мен байланыстарды анықтау бойынша жұмыс жүргізіледі.