Щучинск қаласында биатлоннан әлем чемпионаты өтеді. Хабарланғандай, іс-шара 2023 жылғы 4-12 наурыз аралығында Щучинск қаласындағы Ұлттық шаңғы орталығы базасында өтеді.
Биатлоннан жасөспірімдер арасындағы әлем чемпионатына әлемнің ең мықты жас биатлоншылары келеді.
Олар бес түрлі сайыста жалпы 18 жарыстың жүлдесін сарапқа салады. Чемпионатқа әлемнің 50 мемлекетінен 800-ге жуық спортшы қатысады деп күтіліп отыр.
«Мұндай ауқымды спорттық іс-шара Қазақстанда тұңғыш рет ұйымдастырылуда. 2018 жылы Щучинск қаласында Ұлттық шаңғы орталығы ашылып, Халықаралық Биатлоншылар одағының сертификаттауынан өтті. Ірі халықаралық жарыстарды өткізуге арналған «А» санатындағы лицензияға ие болды. Биыл стадионда Ашық Азия Чемпионатын өткізгеннен кейін біз Орталықтың өзге де ірі жарыстарға дайындығын пысықтап алдық.
Жеткіншектер мен жасөспірімдер арасындағы Чемпионатты өткізу – Қазақстанның биатлон тарихындағы айшықты оқиға. Аталған іс-шара нәтижесінде балалар мен жасөспірімдер арасындағы спортта серпін пайда болатынына сенімдіміз», дейді – Қазақстан Биатлоншылар Одағының Президенті Ермек Қизатов.
Қазақстан жасөспірімдер құрамасының негізгі құрамы желтоқсан айында Щучинск қаласында өтетін Қазақстан Кубогының нәтижелері бойынша белгілі болады.