Станцияда тұрған теміржол вагондарымен поездың соқтығысуы салдарынан локомотив өртенді.
Оқиға туралы толығырақ. ШҚО Аягөз ауданында Жақсыбұлақ станциясында жүк пойызы өздігінен қозғалысқа келген вагондармен соқтығысты. Пойыз рельстен шығып кетті, деп хабарлады “ҚТЖ” ҰК “АҚ баспасөз қызметі.
“25 тамызда сағат 08.15-те Жақсыбұлақ станциясында желдің қатты күшеюіне байланысты станцияда тұрған жүк вагондары өздігінен № 3471 жүк пойызына қарсы қозғалып кетті. Соқтығысу нәтижесінде локомотив және 23 вагон рельстен шығып, локомотив жанып кетті. Құрбан болғандар мен зардап шеккендер жоқ “, – делінген хабарламада.
Оқиға орнына Балқаш және Ақтоғай станцияларынан қалпына келтіру және өрт сөндіру поездары жөнелтілді. Сол жерге мән-жайды анықтау үшін арнайы комиссия келді.
“Оқиға салдарынан Нұр-Сұлтан Нұрлы жол – Достық бағытында № 54 пойыз кешіктірілді. Бұл пойыздың жолаушылары межелі пунктке дер кезінде жетуі үшін оларды автобустармен жеткізу ұйымдастырылады “, – деп толықтырды компанияда.
