Қарағанды облысының кәмелетке толмағандар істері жөніндегі мамандандырылған ауданаралық сотында Сәтбаев қаласындағы тәртіпсіздіктерге қатысты басты сот талқылауы басталды.
54 адам сотқа тартылды. Оның 48-і ер адам және 6-ы әйел. Олар «Ұйымдастыру және жаппай тәртіпсіздіктерге қатысу» және «Үкімет өкіліне қарсы шабуылдау» баптары бойынша айыпталуда.
Естеріңізге сала кетейік, 23 шілдеде Сәтбаев қаласында 5 жасар бала жоғалған болатын. Қызды 62 жастағы күдіктінің пәтерінен тапты. Оған қатысты кәмелетке толмаған баланы ұрлау және зорлау фактісі бойынша сотқа дейінгі тергеу басталды. Ер адам ұсталды, кейінірек оны Қарағанды тергеу изоляторының камерасында асылып қалған күйінде тапты.
Сол күні баланы ұрлау туралы хабарды естіген бір топ қала тұрғыны күдіктінің үйіне барып, өздері жазаламақ болды. Стихиялық әрекет тәртіпсіздікке ұласты.