Украинаға жедел көмек көрсету және АҚШ-тан әскери көмектің кешігуі Еуропаны қолайсыз жағдайға қалдырып отыр. Елдер қауіпсіздік кепілі ретінде Америкаға сеніп отыра бермеу үшін өз қару-жарақ пен оқ-дәрі өндірісін жедел қарқынмен қолға алу керек. Қырғи-қабақ соғыстан кейін еуропалық мемлекеттердің армиясы әлсіреді, себебі оған қажеттілік болмады. Ресей президенті Владимир Путиннің Украинаға баса көктеп кіргенге дейін Еуропадағы бейбітшілік пен тыныштық бұзылмайтындай болып көрінді.
Өткен аптада Германия канцлері Олаф Шольц оқ-дәрі шығаратын жаңа зауыттың іргетасын қалады. Бірақ ол тым кеш. НАТО бойынша еуропалық одақтастардың бюрократиясы Украинаға әскери көмек беру процесін ғана емес, сонымен қатар оларды өндіруді де баяулатып жатыр. Жаңа зауыт келер жылы ғана жұмысын бастайды және 50 000 снаряд шығара алады, ал бұл көрсеткішті тек 2026 жылы ғана ұлғайтуға болады. Ресейдің Украинаға басып кірместен бұрын ресейлік армия күніне 60 000 артиллериялық снаряд шығарып отырған. Қару-жарақ өндiрісі баяу жүріп жатыр.
Бұл АҚШ-тың көмегінсіз Украинаға өз бетінше көмектесу үшін жеткіліксіз болады. Оның үстіне, Еуропа үшін де жеткіліксіз, себебі НАТО Владимир Путин бірнеше жылдан кейін әскери блоктың ең әлсіз мүшелерін қорғануға деген дайындығын сынап көруді жоспарлап отырғанын ескертеді.
Ал Америкада президенттік сайлауына аз уақыт қалды, онда фаворит — Дональд Трамп, ол Путинмен жылы қарым-қатынас орнатып, НАТО бойынша одақтастарын елемейтін. Оның Украинаның қатысуынсыз Ресеймен келіссөз жүргізетіні туралы мәлімдемесі және одақтастарын Мәскеуге жем ретінде қалдырып, НАТО-дан шығуға, басқа мемлекеттерге сыртқы көмекті тоқтатуға дайын екендігі туралы мәлімдемелері батыстық одақтастарының алаңдаушылығын тудырды, себебі АҚШ әлі күнге дейін көптеген мемлекеттер үшін қауіпсіздіктің кепілі болып келген еді.
Еуропа Ресеймен арадағы қақтығыста Американың көмегінсіз Украинаны қажетті қару-жарақпен және оқ-дәрімен қамтамасыз ете алады. Бірақ бұл кем дегенде 10 жылдан кейін ғана орын алады. Бұл туралы Германиядағы жаңа зауыттың директоры айтты. Егер АҚШ Украинаға әскери көмекті тоқтатып, НАТО мүшелеріне көмекке келмесе, бұл Ресейге бүкіл Еуропаны жаулап алуға жол ашады.
«Одақтастар бір-бірін қорғамайды деген секілді сөздер қауіпсіздігімізге, соның ішінде АҚШ-тың қауіпсіздігіне нұқсан келтіреді және америкалық және еуропалық сарбаздарға жұдырық болып тиеді», — деп мәлімдеді НАТО Бас хатшысы Йенс Столтенберг. Әскердің осал тұсын көрсету агрессордың әскери іс-қимылдарға баруына итермелейді. 21 ғасырдың басында-ақ Ресей агрессор елге айналған. Кремльдің мәлімдемелеріне сенуге болмайды. Путин жеткілікті күш жинаған сәтте Еуропаға шабуыл жасайды. Батыс санкциялары қару өндірісін баяулатады, бірақ тоқтатпайды және Иран мен КХДР-дан жеткізілімдерді тоқтата алмайды. Еуропа әскери өндірісті жедел қарқынмен қолға алу керек және өз бейбітшілігін сақтау үшін соғысқа дайындалғаны абзал.