Қазақстан премьер-министрі қызметін атқаратын Асқар Мамин Үкімет отырысында мемлекеттік бағдарламаларды іске асыру бойынша жұмыстарды жеделдетуді тапсырды. Атап айтқанда, ол былай деді:
“Жыл соңына дейін небәрі төрт ай қалды. Әкімдіктерге бағдарламаларды іске асыру бойынша жұмысты жандандыру қажет. Қазіргі жағдайда бірінші кезектегі міндет – азаматтардың жұмыспен қамтылуын қамтамасыз ету. Еңбек нарығында теңгерімсіздік пайда болуына жол беруге болмайды “.
Сондай-ақ, Министрлер кабинетінің басшысы Еңбек министрлігіне барлық мүдделі органдармен және әкімдіктермен бірлесіп мемлекеттік бағдарламаларда көзделген қаражатты толық игеруді және іс-шараларды іске асыруды қамтамасыз етуді тапсырды.
“Электрондық еңбек биржасының бизнес-процестерін оңтайландыру бойынша шаралар қабылдау керек. Әкімдіктер жұмыссыз адамның бейінін қалыптастырсын және онымен жұмыспен қамтуға жәрдемдесу бойынша атаулы жұмыс жүргізсін. Жұмыспен қамтудың жоспарланған индикаторларына қол жеткізуді қамтамасыз ету және тұрақты жұмыс орындарын құруға назар аудару қажет “, – деп атап өтті Асқар Мамин.
