Қазақстанның Ұлттық банкі бес жыл ішінде тазартылған алтынның өлшемді құймаларын сату және сатып алу жөніндегі бағдарламасы бойынша үш тоннадан астам алтын сатқан.
Қазақстан Республикасының Ұлттық банкі бағдарламаны 2017 жылы іске қосты. Бағдарлама қолға алынғалы жалпы салмағы 3,2 тоннаға жуық 94 545 алтын құйма сатылды. Бұл туралы ақпарат ҚР Ұлттық банкінің сайтында жарияланған.
Алтын құймалар бес түрлі салмақта ұсынылады: 5, 10, 20, 50 және 100 г. Сатып алушылар арасында ең көп сұранысқа ие түрі – 10 грамдық алтын құйма.
«Жалпы сатылған құймалар арасында оның үлесі – 26%, яғни, 24 493 дана. Одан кейін 20 грамдық құйма көп сатылады – 20 385 дана (22%), 5 грамдық құймадан 19 468 дана (20%), 100 грамдық құймадан 18 679 дана (20%), 50 грамдық құймадан 11 520 дана (12%) сатылды», — деп хабарлайды реттеуші.
Бағдарлама басталғаннан бері екінші деңгейлі банктер мен банктік емес жекелеген айырбастау пунктері жалпы салмағы 330 келі 13 692 алтын құйманы кері сатып алған, бұл – жалпы сатылған құймалардың 14%-ы. Кері сатып алынған алтын құймалардың барлығы дерлік Ұлттық Банктің филиалдары арқылы халыққа сатылады.
