Америкалық компания Қазақстанда заманауи суару жүйелерінің өндірісін ашады. Мәселе еліміздің премьер-министрі Асқар Мамин қатысуымен шешілуде.
Ол америкалық компанияның жетекшісі Стивен Каневскимен келіссөздер жүргізді деп хабарланды.
Тараптар мал шаруашылығы, селекция, тұқым шаруашылығы, тамшылатып және жаңбырлатып суару, аграрлық ғылым және білім беру салаларындағы ынтымақтастық пен тәжірибе алмасу перспективаларын талқылады.
Келіссөздер қорытындысы бойынша ҚР Ауыл шаруашылығы министрлігі, қазақстандық және америкалық компания арасында инвестициялар туралы келісімге қол қойылды.
Құжат Қазақстанда демонстрациялық фермалар желісін құруды және ауыл шаруашылығы дақылдарының өнімділігін басқару мен суарудың заманауи жүйелерін шығаратын зауыт салуды көздейді. Кәсіпорынның қуаттылығы жылына 1 мың фронталды және айналмалы суару машиналарын құрайды.
Америкалық ирригация технологиялары өсімдік шаруашылығының өнімділігін арттыруға және ауыл шаруашылығындағы су шығынын 50-70%-ға азайтуға мүмкіндік береді.
Демонстрациялық фермалар желісін қалыптастыру суару, су ресурстарын ұтымды пайдалану, жемшөп өндіру, фермерлерді оқыту және тренинг және білікті кадрлар даярлау саласындағы озық технологиялардың трансферін қамтамасыз етеді.
Америкалық компания – су инфрақұрылымы нысандарын басқару және инвестициясы, суармалы егіншілік және ирригациялық жүйелер өндірісі саласындағы әлемдік көшбасшы. Штаб-пәтері АҚШ-тың Небраска штатындағы Омаха қаласында 1946 жылы құрылған. Компанияның жылдық айналымы $2,6 млрд-тан асады.
Үкімет басшысы АӨК ҚР экономикасының қарқынды дамып келе жатқан секторларының бірі болып табылатынын атап өтті. Бұл ретте, БҰҰ жанындағы Азық-түлік және ауыл шаруашылығы ұйымының (ФАО) бағалауы бойынша, Қазақстан ауыл шаруашылығы саласында барынша жоғары елдердің бестігіне кіреді.
“2020 жылдың қорытындысы бойынша ауыл шаруашылығында 5,6%-ға тұрақты өсім қамтамасыз етілді – бұл саладағы соңғы 6 жылдағы ең жоғары көрсеткіш. АӨК жаһандық азық-түлік тізбектеріндегі іркілістердің жалғасуы жағдайында Қазақстанда инфляцияны тежеуде негізгі факторға айналды”, – деді А. Мамин.
Қазақстан тарапынан өткен келіссөзге Премьер-Министрдің Бірінші орынбасары Әлихан Смайылов, ауыл шаруашылығы министрі Сапархан Омаров, ұлттық экономика министрі – Руслан Дәленов, Сыртқы істер министрі – Мұхтар Тілеуберді, ҚР-ның АҚШ-тағы елшісі Ержан Қазыханов, қазақстандық компанияның басшысы Еркін Тәтішев, АҚШ тарапынан – АҚШ-тың ҚР Елшісінің орынбасары Линг Теодор, АҚШ компаниясының президенті және вице-президенті Ленни Адамс пен Джошуа Диксон.
