Соғысты зерттеу институтының (ISW) сарапшылары Ресей Президенті Владимир Путиннің Батысты «жау» деп атап, Украинадағы «экзистенциалды соғыс» туралы мәлімдемесіне талдау жасады. Путин Батыстың Украинаға көмегіне баса назар аударып, мәселе Украинаға көрсетіліп жатқан қолдау емес, Батыс Ресейдің жауы екенін алға тартты.
Ресей Президенті Украина жау ел емес екенін, бірақ Ресейдің мемлекеттілігін жоюды көздеп отырған батыстық ойыншылардан нақты қауіп төніп тұрғанын айтты. Путин Ресей Украинадағы ұрыс алаңдарында Батысты тізе бүктіретініне сенім білдірді.
ISW Путиннің Украинамен емес, Ресей мен Батыс арасындағы текетірес тұжырымдамасын алға тартып отырғанын атап өтті. Сондай-ақ Путиннің мәлімдемесі елдің жоғары әскери шығындарын ақтау және әскери күштерді тұрақты әзірлікте ұстау үшін ұзақмерзімді ақпараттық науқанды жүргізуге дайындығын көрсетеді.