Ресей Президенті Владимир Путин батыс саясаткерлерінің Ресей Еуропаға шабуылдауды жоспарлап отырғаны туралы мәлімдемелерді қатаң түрде жоққа шығарды. Ол өз сөзінде Батыстың өзі де қақтығысты қоздырып, жалған айтып, Ресей аумағына шабуыл жасау орнын таңдап отырғанын атап өтті.
«Олар Украинада, Таяу Шығыста және әлемнің басқа да бөліктерінде қасақана қақтығыстар тудырып, өтірік ақпарат таратуды жалғастыруда. Енді олар Ресей Еуропаға шабуыл жасауға дайындалып жатыр деп сендіруде. Бұл сандырақ. Алайда, олардың өзі біздің жерімізге соққы беру орнын таңдап отырғанын айтты», — деп атап өтті РФ президенті.
Ол өз сөзінде Батыс Ресейде алауыздық тудырып, елді ішінен әлсіретуге ұмтылып, стратегиялық қателік жасағанын мәлімдеді. Путин Ресейдің нық тұрып, сыртқы ықпалдарға бой алдырмайтынын айтты.
Бүгінде Еуропада Ресейдің ықтимал агрессивті әрекеттері туралы ескертулер жиі айтылып келеді. ГФР генерал-лейтенанты Карстен Бройер әскери қақтығыстың ауқымы кеңеюі мүмкін деп алаңдаушылығын білдірген еді. Осы орайда Польша Сыртқы істер министрі Радослав Сикорский НАТО-ға мүше елдерді Ресейге ықтимал баса көктеп кіруіне дайындалуға шақырды.