Польша Украинадан азық-түлікті шығару үшін шекарада ауыр жүк көліктеріне арналған бес жаңа өткізу пункті ашылғанын хабарлады.
Польша Қара теңіздегі украиналық порттар жабылғаннан кейін Украинадан азық-түлікті шығарудың басты дәлізіне айналды. Бұл туралы сейсенбі күні Польша радиосына Польша премьер-министрі кеңсесінің басшысы Михал Дворчик мәлімдеді.
«Қара теңіздегі [украин] порттары жабылғаннан кейін біз — украиналық азық-түлікті шығарудың басты көлік бағыты болдық, — деді ол.
«Біздің транзиттік елге айналуымыз польшалық кәсіпкерлерге айтарлықтай табыс әкеледі, — деді Дворчик. — Бір жағынан біз украиндықтарға көмектесеміз, екінші жағынан поляк кәсіпкерлері табысқа кенеледі».
Дүйсенбі күні Польша-Украина шекарасында ауыр жүк көліктеріне жүруіне арналған 5 жаңа өткізу пункті ашылды. Дворчиктің пікірінше, бұл шекарадағы ұзын-сонар кезектің алдын алып қана қоймай, екі ел арасында тасымалданатын жүктердің көлемін екі есеге ұлғайтуға тиіс. 16 мамырда Польша және Украина билігі Украина астығын Польша арқылы темір жол және жүк көлігімен экспорттауға мүмкіндік беретін құжатқа қол қойды. Құжат Украинадан астық экспорттаумен айналысатын бірлескен поляк-украин кәсіпорнын құруды көздейді.
Дворчик шекарадағы жаңа өткізу пункттері ашылмай тұрып, бұрын Қара теңіз порттарынан Солтүстік Африкаға жөнелтілген 50 млн тонна [украиналық] астықты экспорттауға «Польша инфрақұрылымы дайын емес» деп мәлімдеген болатын. Оның айтуынша, польшалық порттар былтыр жылына небәрі 7 млн тонна астық жөнелткен.
