Алты жыл бұрын хабар-ошарсыз жоғалып кеткен Астана қаласының тұрғыны Ақмола облысы, Қорғалжын ауданының Шалқар ауылында табылды. Полиция қызметкерлері аймақта жедел-іздестіру іс-шараларын жүргізу барысында 40 жастағы ер адам жеке меншік үйден тапқан.
Жоғалған адамның қарындасы 2018 жылдың жазында оның жоғалғанын айтып жүгінген, содан кейін елордалық және облыстық полицейлер белсенді іздестіруге кірісті. Көп жылдар бойы оның орналасқан орны белгісіз, оған мемлекетаралық іздеу жарияланған.
Ер адамның ұзақ уақыт неліктен хабарсыз кеткені және туыстарымен неліктен байланысқа шықпағаны анықталып жатыр. Полицейлердің бірлескен күш-жігерінің арқасында ер адам табылды.