Павлодарлық алаяқтар жалған құжаттар негізінде меншік құқығын қайта ресімдеу арқылы қайтыс болған адамдардың пәтерлерін иемденген. Сот ҰҚТ-ның барлық мүшесіне айыптау үкімін шығарды.
Қалалық № 2 қылмыстық соттың үкіміне сәйкес, сотталушылар 2007-2018 жылдар аралығында азаматтардың пәтерлерін иемденіп алған. Олар мұны қайтыс болғандардың немесе шетелге тұрақты тұруға кеткен жылжымайтын мүлік иелерінің атынан жекешелендіру шарттарын, сенімхаттар мен сатып алу-сату шарттарын қолдан жасау арқылы жүзеге асырған.
Алаяқтар он пәтерді иемденіп, тағы тоғызына қол сұққан. Кейін пәтер басқа тұлғаларға сатылған.
Сот сотталушылардың кінәсі жәбірленушілер мен куәгерлердің айғақтарымен, сондай-ақ бірқатар сот сараптамаларының қорытындыларымен дәлелденді деп есептеді. Сонымен қатар, ресми құжаттарды қолдан жасаудың бірнеше эпизодтары бойынша олар осы қылмыстық құқық бұзушылықтарды жасауға қатысуы дәлелденбеуіне байланысты ақталды.
Жасалған әрекет ауыр қылмыстар санатына жатады және он жылға дейін бас бостандығынан айыратын ең ұзақ мерзім қарастырылады.
Мемлекеттік айыптаушы қылмыстардың жиынтығы бойынша төрт жылдан сегіз жылға дейін бас бостандығынан айыруды сұрады.
Жәбірленушілер сот шешімімен келісетіндерін мәлімдеді.
Төрт сотталушы кінәсін ішінара мойындап, жеңіл жаза сұрады. Қалған сотталушылар өздерін ақтауды сұрады.
Судья Лачин Әлиев қылмыстардың жиынтығы бойынша қылмыстық топтың ұйымдастырушысын сегіз жылға бас бостандығынан айырды. Қалған сотталушылар төрт жылдан алты жылға дейін бас бостандығынан айырылды. Азаматтық талап арыз берілмеген.
Бұдан басқа, сот Қылмыстық іс жүргізу кодексінің нормаларын сотқа дейінгі тергеу барысында жол берілген бұзушылықтарға байланысты, сондай-ақ куәгерлердің біреуінің сотта жалған айғақтар беру фактісі бойынша облыстық полиция департаменті мен прокурордың атына жеке қаулылар шығарды.
Қылмыстық топтың ұйымдастырушысы үкімді жария еткеннен кейін судьяны барынша қатаң жаза тағайындағанын айтып айыптай бастағанын атап өткен жөн.
“Кісі өлтіргені үшін бұдан аз береді! Аллаһқа тапсырдым! “- деп айқайлап, жоғарыдағы инстанциялар оны міндетті түрде ақтайтынын мәлімдеді. Тәртіп бұзушыны мәжіліс залынан шығаруға тура келді.
Үкім әлі заңды күшіне енген жоқ.
